Luke 19

UZakhewu Umthelisi

1UJesu wangena eJerikho kodwa esedlula.

2Kwakulendoda eyayithiwa nguZakhewu; wayeyinduna yabathelisi, enothile. 3Wayefuna ukubona uJesu ukuthi unjani, kodwa ngoba yena wayengumuntu omfitshane wehluleka ngenxa yesiminyeminye. 4Wasegijimela phambili wakhwela phezu komkhiwa wesikhamori ukuze ambone njengoba uJesu wayesiza ngaleyondlela.

5Kwathi uJesu esefikile kuleyondawo wakhangela phezulu wathi kuye, “Zakhewu, yehlika masinyane. Ngizakwethekelela endlini yakho lamuhla.” 6Wasesehla masinyane wamamukela ngokuthokoza.

7Bonke abantu bakubona lokhu base besolasola besithi, “Useye kuba yisethekeli ‘sesoni’.”

8Kodwa uZakhewu wasukuma wathi eNkosini, “Khangela, Nkosi! Okwamanje nje senginika ingxenye yenotho yami kwabampofu, njalo uma ngike ngadlelezela omunye umuntu loba ngakuphi, ngizambhadala ngokuphindwe kane lokho engakuthathayo.”

9UJesu wasesithi kuye, “Namuhla insindiso isifikile kule indlu, ngokuba indoda le layo iyindodana ka-Abhrahama. 10Ngokuba iNdodana yoMuntu yalanda ukudinga lokusindisa lokho okwakulahlekile.”

Umzekeliso Wamamina Alitshumi

11Bathi besalalele lokhu waqhubeka wabatshela umzekeliso, ngokuba wayesesondele eJerusalema, abantu sebecabanga ukuthi umbuso kaNkulunkulu wawusuzahle uvele masinyane. 12Wathi, “Indoda ethile yasesikhosini ngokuzalwa yaya elizweni elikude isiyagcotshwa ubukhosi anduba ibuye. 13Yasibiza izinceku zayo ezilitshumi yazinika imali engamamina alitshumi. Yathi, “Yisebenziseni imali le ngize ngibuye.

14“Kodwa labo bantu ayezababusa babemzonda umuntu lo bathumela izigijimi ukumlandela ziyokuthi, ‘Kasimfuni lumuntu ukuthi abe yinkosi yethu.’

15“Wabekwa waba yinkosi, loba kunjalo, wasebuya ekhaya. Wasebiza izinceku lezo ayezinike imali, ukuze ezwe ukuthi zazithole nzuzo bani ngayo.

16“Owokuqala weza wathi, ‘Mnumzana, imina yakho izuze amanye alitshumi.’

17“ ‘Wenze kuhle, nceku yami enhle!’ kusitsho inkosi yayo. ‘Ngenxa yokuthi uthembekile ngento encinyane, usuzabusa amadolobho alitshumi.’

18“Owesibili weza wathi, ‘Mnumzana, imina yakho isizele amanye amahlanu.’

19“Inkosi yayo yaphendula yathi, ‘Busa phezu kwamadolobho amahlanu.’

20“Kwase kusiza enye inceku yathi, ‘Mnumzana, nansi imina yakho; bengiyigcinile igoqelwe elenjini.

21Ngibengikwesaba wena ngokuba uyindoda elukhuni. Ucupha lokho ongakuthelanga phakathi, uvune lokho ongakuhlanyelanga.’

22“Inkosi yayo yaphendula yathi, ‘Ngizakucala ngamazwi akho, wena nceku exhwalileyo! Ubukwazi, angithi, ukuthi ngingumuntu olukhuni, ngicupha lokho engingakuthelanga, ngivune lokho engingakuhlanyelanga? 23Kungani pho ungabekanga imali yami enzalisweni ukuze kuthi ekubuyeni kwami ngiyithathe isilenzuzo na?’

24“Yasisithi kwababemi khonapho, ‘Mthatheleni imina le alayo liyiphe lowo olamamina alitshumi.’

25“Basebesithi, ‘Mnumzana, kanti angithi uvele uselalitshumi?’

26“Yaphendula yathi, ‘Ngithi kini, lowo olakho uzaphiwa okunye okunengi, kodwa lowo ongelalutho, lalokho alakho uzakwemukwa. 27Kodwa izitha zami lezo ebe zingafuni ukuthi ngizibuse – ziletheni lapha lizibulalele phambi kwami.’ ”

Ukungena Kobukhosi

28UJesu esetshilo zonke lezi izinto wahamba wabendulela eqonda eJerusalema. 29Wathi esebanga eBhethifage kanye leBhethani entabeni eyayithiwa iNtaba yama-Oliva wathuma abafundi bakhe ababili wathi kubo:

30“Yanini emzini ophambi kwenu, elizakuthi lingena kuwo libone ithole likababhemi likhulekiwe khonapho, elingakaze kukhwele muntu kulo. ‘Lithukululeni lililethe lapha. 31Uma umuntu elibuza esithi, Lilithukululelani na?’ limtshele lithi, ‘INkosi iyaliswela.’ ”

32Labo ababethunyiwe bahamba bafumana kunjengoba wayebatshelile. 33Besalithukulula ithole abanini balo bababuza bathi, “Lilithukululelani ithole likababhemi lelo na?”

34Baphendula bathi, “INkosi iyaliswela.”

35Baliletha kuJesu, baphosela amajazi abo phezu kwalo ithole bakhweza uJesu kulo. 36Wathi eseqhubeka abantu bendlala amajazi abo endleleni.

37Esefikile eduze kwendawo lapho indlela eyehla khona isuka eNtabeni yama-Oliva ixuku lonke labafundi lasuka ngokuthokoza ladumisa uNkulunkulu liqongisa amazwi ngenxa yayo yonke imimangaliso ababeyibonile, bathi:

38“Ubusisiwe umbusi ozayo ngebizo leNkosi!” “Ukuthula ezulwini lenkazimulo kweliphezulu!”

39Abanye abaFarisi exukwini bathi kuJesu, “Mfundisi, khuza abafundi bakho!”

40Waphendula wathi, “Ngiyalitshela ngithi aluba bethula amatshe azamemeza.”

41Wathi esebanga eJerusalema elibona idolobho walikhalela 42wathi, “Uma wena, wena ngokwakho, ubukwazi namhla lokho obekungakulethela ukuthula – kodwa okwamanje kufihliwe emehlweni akho. 43Zizafika izinsuku kuwe lapho izitha zakho zizakwakha umthangala zikuhonqolozele zikuphahle inxa zonke.

44Zizakusakazela phansi emhlabathini, wena kanye labantwana abaphakathi kwemiduli yakho. Kaziyikutshiya lalinye ilitshe phezu kwelinye, ngokuba kawusinanzelelanga isikhathi sokuza kukaNkulunkulu kuwe.”

45Wasengena eThempelini wadudula ababethengisa khona wabaxotsha, 46esithi kubo, “Kubhaliwe ukuthi, ‘Indlu yami iyindlu yokukhuleka; kodwa lina seliyenze ubhalu lwamasela.’ ”

47Izinsuku zonke wayefundisa ethempelini. Kodwa abaphristi abakhulu labafundisi bomthetho kanye labakhokheli ababephakathi kwabantu babezama ukumbulala. 48Kodwa kabayizuzanga indlela yokukwenza lokho, ngokuba abantu bonke babewakholwa amazwi akhe.